કેટલાક દર્દીઓ કોરોનામાંથી સ્વસ્થ થયા પછી ફેફસાના ગંભીર રોગથી ગ્રસ્ત છે

India
  • (હમલોગ.ન્યૂઝ દ્વારા)

કોવિડ-૧૯ના દર્દીઓ માટે રિકવરીનો માર્ગ લાંબો થતો જઈ રહ્યો હોય તેમ લાગી રહ્યું છે. કોરોનાથી રિકવર થયેલા દર્દીઓ લંગ ફ્રાઈબ્રોસિસ સાથે પરત ફરી રહ્યા હોવાનું ગુજરાતભરના ડોકટરોના ધ્યાનમાં આવ્યું છે.

રાજકોટના પલ્મોનોલોજિસ્ટ ડો.નિરજ મહેતાને ત્યાં હાલ આવા ચાર દર્દીઓ સારવાર હેઠળ છે. જેમાંથી સારવાર બાદ ત્રણનો રિપોર્ટ નેગેટિવ આવી ચૂકયો હતો પરંતુ લંગ ફાઈબ્રોસિસની સારવાર માટે ફરીથી દાખલ કરવામાં આવ્યા હતા. ચોથા દર્દીને કોરોનાથી રિકવર થયા બાદ ડિસ્ચાર્જ કરવાનો હતો તેના આગળના દિવસે તેને ફેફસાંનું ઈન્ફેકશન થયું હતું.

ડો. નિરજ મહેતાએ કહ્યું કે, ‘લાંબા સમય સુધી વેન્ટિલેટર પર રહેલા દર્દીઓને ફેફસાં સાથે જોડાયેલી બીમારી થાય છે’.

‘કોરોના એવા દર્દીઓના ફેફસાંને ગંભીર ઈજા પહોંચાડે છે, જેઓ લાંબા સમય સુધી ઓકિસજન પર રહ્યા બાદ હોસ્પિટલમાંથી બહાર આવે છે. ઘણા કેસોમાં, દર્દીઓને જયારે ડિસ્ચાર્જ કરવામાં આવે છે ત્યારે તેઓ સામાન્ય રીતે શ્વાસ લેવાનું શરુ કરે છે, પરંતુ તેમના ફેફસાં તે રીતે કામ કરી રહ્યા હોતા નથી. હવાના પ્રદૂષણની સાથે, આવા દર્દીઓ ફેફસાંને લગતી બીમારીથી પીડાઈ શકે છે. નાના દર્દીઓમાં પણ આવી સમસ્યા જોવા મળી રહી છે, જયારે અન્ય વાયરસની વાત આવે છે ત્યારે આવું કંઈ નહોતું’, તેમ અન્ય પલ્મોનોલોજિસ્ટ ડો. મિલન ભંડેરીએ જણાવ્યું હતું. તેમ ટાઇમ્સ ઓફ ઇન્ડિયા ઉમેરે છે.

ડોકટરોનું કહેવું છે કે, કોવિડથી રિકવર થયેલા દર્દીઓ કે જેમને પોતાના ઘરે ઓકિસજન પર રહેવાની સલાહ આપવામાં આવે છે, તેઓ પણ ફાઈબ્રોસિસ થવાનું જોખમ ધરાવે છે.

‘કોરોનાના દર્દીઓ કે જેમને ૧૦ કરતાં વધુ દિવસ માટે વેન્ટિલેટર અથવા ઓકિસજન સપોર્ટ પર રહેવાની જરૂર પડે છે, તેમને લંગ ફાઈબ્રોસિસ થવાનું જોખમ વધારે છે’, તેમ રાજકોટ મેડિકલ અસોસિએશનના પ્રમુખ ડો. જયધિરવાણીએ જણાવ્યું હતું.

‘અમે કોવિડ-૧૯થી રિકવર થયેલા દર્દીઓમાં લંગ ફાઈબ્રોસિસના કેટલાક કેસ જોયા છે’, તેમ SMIMER હોસ્પિટલના એડિશનલ પ્રોફેશન (મેડિસિન) ડો. દીપક શુકલાએ કહ્યું હતું.

‘અત્યાર સુધીમાં મેં કોવિડ-૧૯ પછી મોડરેટ પલ્મનરી ફાઈબ્રોસિસવાળા ત્રણ દર્દીઓની તપાસ કરી છે. કોરોનાના દર્દીઓ કે જેમને ફેફસાંમાં સોજો હોય છે તેઓ પલ્મોનરી ફાઈબ્રોસિસનું જોખમ ધરાવે છે. ૫૦ વર્ષથી ઉપરની ઉંમરના લગભગ ૨૦ ટકા દર્દીઓને ફેફસાંમાં ગંભીર સોજો હોવાથી ફાઈબ્રોસિસ થવાનો ખતરો છે’, તેમ સુરતની સરકારી મેડિકલ કોલેજના ડિપાર્ટમેન્ટ ઓફ ટીબી એન્ડ ચેસ્ટના અસોસિએટ પ્રોફેસર ડો. પારુલ વડગામાએ જણાવ્યું હતું.

સરળ શબ્દોમાં કહીએ તો લંગ ફાઈબ્રોસિસ એટલે ફેફસાંમાં ઈજા પહોંચવી. લંગ ફાઇબ્રોસિસ એટલે ફેફસાના લંગ ટિસ્યૂને જખમ થવું. આવા ટિસ્યૂ સામાન્ય ફેફસાંને પણ નુકસાન પહોંચાડી શકે છે અને તમારા લોહીમાં પ્રવેશ કરવા માટે ઓકિસજનને મુશ્કેલ બનાવે છે. ઓકિસજનના ઓછા પ્રમાણના કારણે શ્વાસ લેવામાં તકલીફ પડી શકે છે, ખાસ કરીને જયારે તમે ચાલતા હો અથવા એકસર્સાઈઝ કરતા હો. કોરોના બાદ લંગ ફાઈબ્રોસિસ ટિસ્યૂને સખત બનાવે છે અને તેના કારણે દર્દીને યોગ્ય રીતે શ્વાસ લેવામાં મુશ્કેલી પડે છે. કેટલીકવાર ઓકિસજન સપોર્ટની જરૂર પડે છે.

લંગ ફાઈબ્રોસિસ થવાનું જોખમ કોને વધારે રહેલું છે?

–  વધુ ઉંમર

–  ન્યૂમોનિયા

–  વેન્ટિલેટર પર રહેલા દર્દીઓ

–  લાંબા સમય સુધી હોસ્પિટલમાં દાખલ થવાની જરૂર હોય તેવા દર્દીઓ

લંગ ફાઈબ્રોસિસના લક્ષણો

–   ઉધરસ

–   શ્વાસ લેવામાં તકલીફ

–  થાક